Çilov qəsəbə İƏD üzrə nümayəndəliyinin 2019-cu ildəki fəaliyyətinə dair hesabat yığıncağı keçirildi

       Yanvarın 16-da Çilov qəsəbəsindəki “28 May” NQÇİ-nin Mədəniyyət evində Pirallahı  Rayon İcra Hakimiyyəti başçısının Çilov qəsəbə İƏD üzrə nümayəndəliyinin 2019-cu ilin sosial-iqtisadi inkişafın yekunları və 2020-ci ildə qarşıda duran vəzifələrə həsr olunmuş hesabat yığıncağı keçirildi. Tədbirdə Rayon İcra Hakimiyyəti başçısının müavini İsmayıl Əliyev, “28 May” NQÇİ-nin rəisi Zaur Bağırov, RIH əməkdaşları, təsərrüfat xidmətlərinin rəhbərləri, eləcə də qəsəbə sakinləri iştirak etdilər.
      Pirallahı Rayon İcra Hakimiyyəti başçısının Çilov qəsəbə İƏD üzrə nümayəndəsi İlham İbrahimov 2019-cu ilin sosial-iqtisadi inkişafının yekunları və 2020-ci ildə qarşıda duran vəzifələrə həsr olunmuş hesabat məruzəsi ilə çıxış etdi. Natiq bildirdi ki, Çilov qəsəbə  nümayəndəliyi öz  işini  2019-cu il  üçün Pirallahı  rayon  İcra  Hakimiyyətinin Başçısı cənab Vasif  İmanovun təsdiq etdiyi iş planı əsasında qurmuşdur. Məruzədə nümayəndəliyin rayon ərazisində keçirilən mədəni-kütləvi tədbirlərdə və rayonun ictimai-siyasi həyatında yaxından iştirak etdiyini vurğulandı.
      İlham İbrahimov bildirdi ki, qəsəbə  nümayəndəliyi  il  ərzində  gördüyü  işləri “28 May” NQÇİ-nin Mənzil Kommunal  İstismar  sahəsinin  köməkliyi  ilə  yerinə yetirmişdir. Belə ki, il  ərzində  qəsəbə əhalisinə  su, qaz  və  elektrik  enerjisinin  fasiləsiz  verilməsi təmin olunmuş, kommunal xidmətlərə görə ödənişlərin vaxtında yerinə yetirilməsi daim nəzarətdə saxlanılmışdır. Kommunal xidmətlərin ödənişində çətinliyi olan  aztəminatlı  və  imkansız  ailələr ilə də ödəniş edilməsi barədə vaxtaşırı  maarifləndirici  söhbətlər  aparılmışdır. Qəsəbədə məskunlaşan qaçqın və məcburi köçkün ailələri, yaşlı və köməyə ehtiyacı olan sakinlər mütəmadi olaraq diqqət mərkəzində saxlanılmış, onların çətinlikləri, problemləri hərtərəfli araşdırılmış, imkan daxilində onlara köməklik göstərilmişdir. Mütəmadi olaraq Mənzil Kommunal Təsərrüfatı əməkdaşlarının köməyi ilə qəsəbənin mərkəzi yolunda, daxili küçələrində sanitar-təmizlik işləri həyata keçirilmişdir. Gənclərin asudə vaxtının səmərəli təşkili üçün “28 May” NQÇİ-nin futbol meydançasında idman yarışları keçirilmiş, yay mövsümündə dəniz kənarında çimərliklər təşkil edilmişdir.
      Natiq görülən işlərdə Pirallahı RİH başçısı Vasif İmanovun və “28 May” NQÇİ-nin rəhbərliyinin göstərdiyi köməyi xüsusi vurğulamışdır. Qeyd edildi ki, 2019-cu  il  ərzində 10 əmr verilmiş, RİH-dən 11 əmr və  sərəncam daxil olmuş, 82 nəfər  sakin  rəsmi  olaraq  nümayəndənin qəbulunda  olmuş, 125 nəfər isə  şifahi  müraciət etmişdir. Edilmiş hər bir müraciət aidiyyəti orqanlara göndərilərək vətəndaşlara  müvafiq  köməkliklər  göstərilmişdir.  RİH- dən və digər aidiyyəti orqanlardan 11 sənəd daxil olmuş, 32 məktub  göndərilmiş, 6 yazılı  ərizə və şikayət daxil olmuşdur. Daxil olan hər bir sənədə vaxtında cavab verilmişdir. 2019-cu il ərzində 109 Forma 2  arayış verilib.  Hərbi komissarlığa arayış verilməyib, sakinlərə  isə yaşayış yerindən 411 nəfərə arayış verilmişdir. 
     Rayon İcra Hakimiyyəti başçısının müavini İsmayıl Əliyev çıxış edərək Azərbaycan Respublikasının Prezidenti cənab İlham Əliyevin rəhbərliyi altında ölkədə abadlıq və quruculuq sahəsində, həmçinin sosial-iqtisadi sahədə əldə edilmiş nailiyyətlər barədə ətraflı məlumat verdi. Qeyd edildi ki, ölkəmizin bütün guşələrində olduğu kimi, Pirallahı rayonunda da abadlıq-quruculuq işləri aparılır. Görülmüş tədbirlər çərçivəsində Pirallahıda mühüm tikinti-quruculuq və abadlıq işləri həyata keçirilir, irimiqyaslı infrastruktur layihələri icra olunur, yol-nəqliyyat infrastrukturu yaxşılaşdırılılır, əhalinin kommunal xidmətlərlə, o cümlədən elektrik enerjisi, qaz və su ilə təchizatı, səhiyyə və təhsil müəssisələrinin tikintisi və yenidən qurulması istiqamətində mühüm tədbirlər həyata keçirilir, bu sahəyə irihəcmli dövlət investisiyaları yönəldilib. İsmayıl Əliyev ötən il rayonda aparılan işlər və gələcəkdə reallaşacaq layihələr haqqında ətraflı məlumat verərək bildirdi ki,  RİH tərəfindən görülən işlər gələcəkdə Çilov qəsəbəsinin də nümunəvi bir yaşayış məntəqəsinə çevrilməsinə əlverişli şərait yaradacaqdır.
     “28 May” NQÇİ-nin rəisi Zaur Bağırov, 131 nömrəli tam orta məktəbin müəllimi Neymət Alıyev, qəsəbə sakinləri Gülpəri Əhmədova və Abbas Səfərov dinlənilən hesabata münasibət bildirdilər. Hesabat yığıncağında məruzəçilər çıxışlarında əhalini narahat edən məsələlərə də toxundular, qaldırılan məsələlərin həlli yolları barədə ciddi fikir mübadiləsi apardılar. Yığıncaqda sakinləri maraqlandıran suallar cavablandırıldı.
     Sonra toplantının qərarı ilə Pirallahı Rayon İcra Hakimiyyəti Başçısının Çilov qəsəbə İƏD üzrə nümayəndəliyinin 2019-cu ilin yekunlarına dair hesabat məruzəsi qənaətbəxş hesab olundu. Hesabat yığıncağının sonunda qərar layihəsi oxundu.