Dövlətimiz koronavirusla mübarizədə prioritetlərini düzgün müəyyən edib

      “Bu gün dünyada elə bir dövlət yoxdur ki, pandemiyanın doğurduğu çətinliklər qarşısında  qalmasın. Bildiyiniz ki, pandemiya proqnozlaşdırılan, planlaşdırılan bir problem deyildi ki, hökumət əvvəldən buna hazırlaşsın. Ancaq Azərbaycan dövləti koronavirusla mübarizədə prioritetlərini düzgün müəyyən edib. Bu gün dövlətimiz əsas gücünü vətəndaşın yaşamaq hüququna təhdid yaradan koronavirus infeksiyası ilə mübarizəyə yönəldib. Dövlət başçısının özünün də qeyd etdiyi kimi, “əgər biz vaxtında qabaqlayıcı tədbirlər görməsəydik, bu gün Azərbaycanda xəstələrin sayı min yox, bəlkə on min, iyirmi min, bəlkə də daha çox olardı.” Dövlətin burada əsas məqsədi odur ki, vəziyyətdən az itkilərlə çıxaq, vətəndaşlara kömək göstərək, onları bu bəladan qoruyaq və onların sosial müdafiəsini təmin edək.”
      Cənab Prezident vətəndaşlara müraciətlə söyləyib: “Məsuliyyətli olun, nizam-intizamı, qaydaları pozmayın, özünüzü, uşaqlarınızı, yaxınlarınızı qoruyun ki, biz bu ağır vəziyyətdən az itkilərlə çıxa bilək! Biz birlikdə güclüyük!”
      Dünya təcrübəsi də göstərir ki, yoluxma sürəti olduqca yüksək olan bu virus pandemiyası ilə mübarizənin effektli nəticəsi önləyici, profilaktik tədbirlərin vaxtında və geniş həcmdə aparılmasından çox asılıdır. Cənab Prezidentin tapşırığı ilə ölkəmizin bütün resursları səfərbər olunub və koronavirus epidemiyası ilə ardıcıl, sistemli, çoxşaxəli mübarizə aparılır. Sərhədlərin bağlanması, xaricdə olan 15 mindən çox vətəndaşımızın ölkəyə gətirilməsinin və karantin rejiminə keçirilməsinin təmin edilməsi, müayinə test və laboratoriya ləvazimatlarının, eləcə də müalicə vasitələrinin alınıb gətirilməsi, Nazirlər Kabineti yanında Operativ Qərargahın təşkil olunması, Koronavirusla Mübarizəyə Dəstək Fondunun yaradılması, koronavirus infeksiyasının mənfi təsirlərinin azaldılması məqsədi ilə dövlət büdcəsindən başlanğıc olaraq 1 milyard manat vəsaitin hökumətə ayrılması, iki həftəlik sərt karantin rejiminə keçilməsi və s. kimi tədbirlər Azərbaycan dövlətinin bu ümumbəşəri bəla ilə mübarizədə nə qədər güclü və əzmkar olmasının, dövlət başçısının siyasi müdrikliyinin və qətiyyətinin göstəricisidir.
       Azərbaycan  Respublikasında  koronavirus infeksiyasının (COVİD-19) yayılmasının  qarşısının alınması  məqsədilə  Nazirlər  Kabineti yanında  Operativ Qərargahın tələb və tövsiyələrinə uyğun olaraq  mənim deputat seçildiyim  13 saylı  Xəzər-Pirallahı  seçki dairəsinə aid olan  Xəzər və Pirallahı rayonlarının İcra  hakimiyyətləri tərəfindən qabaqlayıcı tədbirlər həyata keçirilir. Bakı Şəhər Mənzil Kommunal Təsərrüfatı Departamenti , Xəzər və Pirallahı rayonlarının  Mənzil Kommunal Təsərrüfatı Birlikləri tərəfindən xüsusi  texniki vasitələrlə bu rayonların bütün qəsəbələrində , küçələrdə, yollarda, parklarda, yaşayış binalarının həyətlərində və girişlərində dizinfeksiya işləri aparılır. Eyni zamanda, mütəmadi olaraq rayonların ərazilərindəki məişət tullantıları konteynerlərində və meydançalarında, məhəllələrdəki idman-əyləncə qurğularında, yeraltı piyada keçidlərində yol kənarlarında və səkilərdə, dayanacaqlarda və ticarət obyektlərinin ətrafında da dizinfeksiya işləri aparılır. “Biz  birlikdə güclüyük”  şüarı ilə həyata keçirilən layihə çərçivəsində Xəzər və Pirallahı Rayon İcra  Hakimiyyətləri  və  YAP-nın  Xəzər və Pirallahı Rayon  təşkilatları tərəfindən   Xəzər və Pirallahı rayonlarında yaşayan şəhid ailələrinə, Qarabağ müharlbəsi əlillərinə, 65 yaşdan yuxarı olan vətəndaşlarımıza və digər imkansız ailələrə ərzaq məhsullarından ibarət yardımlar paylanmışdır. Rayon sakinləri bu xeyirxah aksiyaya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.
       Hər bir vətəndaşımız Prezident İlham Əliyevin çağırışına ciddi şəkildə əməl etməlidir” “Əməl olunmalıdır ki, hökumətimizin göstərdiyi səylər öz nəticəsini versin, koronavirus bəlasından tezliklə xilas ola bilək. Çünki üzləşdiyimiz sınaqdan birliyimiz və həmrəyliyimizlə xilas ola bilərik.

 
Milli Məclisin deputatı
Rauf  Əliyev