“31 dekabr-Dünya Azərbaycanlılarının Həmrəylik günü” və “Yeni il bayramı” münasibətilə təntənəli bayram tədbiri keçirildi
29 dekabr 2022 | 15:51
29 dekabr 2022-ci il tarixdə Vaqif Mustafazadə adına Mədəniyyət Mərkəzində “31 dekabr - Dünya Azərbaycanlılarının Həmrəylik günü” və “Yeni il bayramı” münasibətilə təntənəli bayram tədbiri keçirildi. Pirallahı Rayon İcra Hakimiyyətinin və Vaqif Mustafazadə adına Mədəniyyət Mərkəzinin birgə təşkilatçılığı ilə baş tutan tədbirdə RİH başçısının birinci müavini Vəzir Səfixanov, YAP Pirallahı rayon təşkilatının sədri Emil Abasov, şəhid ailələrinin nümayəndələri, Vətən müharibəsi iştirakçıları və rayon ictimaiyyəti iştirak etdi.
Vətən uğrunda qəhrəmancasına həlak olmuş şəhidlərimizin əziz xatirəsinin bir dəqiqəlik sükutla yad edilməsi ilə başlayan tədbirim rəsmi hissəsində Vəzir Səfixanov çıxış edərək, il ərzində baş vermiş əhəmiyyətli hadisələrdən söz açdı. Natiq 2022-ci ilin respublikamız üçün uğurlu olduğunu, istər iqtisadi, istər siyasi, istərsə də hərbi baxımdan nailiyyətlərlə zəngin olduğunu qeyd etdi. Əlavə olaraq, cari ilin rayonumuz üçün də uğurlu olduğu vurğulandı. Çıxışının sonunda V.Səfixanov qarşıdan gələn 31 dekabr - Dünya Azərbaycanlılarının Həmrəylik günü və Yeni 2023-cü ilin gəlişi münasibəti ilə tədbir iştirakçılarını təbrik edərək, onlara yeni ildə can sağlığı, sevinc dolu günlər arzu etdi.
Daha sonra Yeni Azərbaycan Partiyası Pirallahı rayon təşkilatının sədri Emil Abasov çıxış edərək Dünya Azərbaycanlılarının Həmrəylik Günü münasibətilə tədbir iştirakçılarını təbrik etdi. Bu günün tarixi önəmindən bəhs edən E.Abasov xalqımızın həmrəyliyinin və birliyinin daim vacib olduğunu, iki il öncə torpaqlarımızın işğaldan azad olunmasının Müzəffər Ali Baş Komandan, Prezident İlham Əliyevin rəhbərliyi altında məhz bu milli birlik və vəhdətin nəticəsində mümkün olduğunu qeyd etdi.
Rəsmi hissənin sonunda rayonun ictimai həyatında səmərəli fəaliyyətlərinə görə fərqlənən şəxslərə RİH başçısının və YAP Pirallahı rayon təşkilatının Fəxri Fərmanları və mükafatlar təqdim olundu.
Tədbir yeni il şənliyi ilə davam etdi. Rəngarəng musiqi nömrələrinin səhnələndiyi bayram tədbirində uşaqlar Şaxta baba, Qar qız və nağıl qəhrəmanları ilə birgə rəqs edib, şənləndi, maraqlı oyunlar keçirdi. Sonda Şaxta baba və Qar qız şəhid övladları başda olmaqla uşaqlara yeni il sovqatları təqdim etdi.
Keçidlər
