Milli Qəhrəman Yavər Əliyevin xatirəsinə həsr olunmuş tədbir keçirildi

     29 fevral 2016-cı il tarixdə Pirallahı Rayon İcra Hakimiyyətinin təşkilatçılığı ilə Yavər Əliyevin adını daşıyan 235  nömrəli tam orta məktəbdə Milli Qəhrəmanın xatirəsinə həsr olunmuş tədbir keçirildi. Tədbirdə RİH-in məsul əməkdaşları, rayon ictimaiyyətinin nümayəndələri, Milli Qəhrəman Yavər Əliyevin oxuduğu tam orta məktəbin müəllim heyəti və şagirdlər iştirak etdilər.
     Pirallahı Rayon İcra Hakimiyyəti məsul əməkdaşı, ictimai-siyasi və humanitar məsələlər üzrə şöbə müdirinin müavini  Vüsal Babayev milli qəhrəmanın hərbi xidməti, onun vətənpərvərliyi ilə bağlı gələcəyin əsgərləri olan gənclərə geniş məlumatların verilməsinin, onların ibtidai hərbi hazırlıqlarının yüksəldilməsinin vacibliyini vurğuladı.
      Tədbirdə çıxış edən 235 nömrəli tam orta məktəbin direktoru Tahir Süleymanov, rejissor Cavad Səlimov Milli qəhrəmanın təhsil illərindən, əsgərlik həyatından və döyüş yolundan ətraflı söhbət açdılar. Diqqətə çatdırıldı ki,  Yavər Əliyev Pirallahı adasında 235 №-li  tam orta məktəbi bitirdikdən sonra Kremençuq Aviasiya Məktəbinə daxil olmuşdur. Y. Əliyev bir neçə dəfə Qarabağa Mİ-24 vertolyotunda uçuşlar etmişdi. Aşağı yüksəklikdə uçaraq düşmən mövqelərinə ağır zərbələr endirirdi. Bu uçuşlar zamanı ermənilər çoxlu itkilər verirdi. 1992-ci il 29 fevral tarixində Yavərin sonuncu uçuşu oldu.
       Tədbirin sonunda məktəblilərin ifasında ədəbi-bədii kompozisiyalar və Cavad Səlimovun  Yavər Əliyev haqqında çəkdiyi film nümayiş olundu.