Hər şey Vətən üçün!

Pirallahı rayonunda şəhid Sarvan Natiq oğlu Mehralıyevin əziz xatirəsini anıldı

 

        Bu il aprel ayının 1-i gecədən başlayaraq mənfur erməni işğalçıları Qarabağ bölgəsində, qoşunların təmas xəttində növbəti dəfə təxribata əl atmış, atəşkəs haqqında razılaşmanı xaincəsinə pozaraq Azərbaycan ordusunun mövqelərinə genişmiqyaslı hücuma keçmişlər. Bununla əlaqədar aprelin 2-də keçirilmiş Azərbaycan Respublikası Prezidentinin yanında Təhlükəsizlik Şurasının iclasındakı çıxışında Dövlətimizin başçısı, Azərbaycan Prezidenti İlham Əliyev bildirmişdir: " ... bizim qəhrəman döyüşçülərimiz nəinki təxribatın qarşısını ala bildilər. Eyni zamanda, daha əlverişli hərbi mövqelərə malik oldular. Bu gün təmas xəttində Azərbaycanın üstünlüyü daha da möhkəmləndi. Aparılan hərbi əməliyyat nəticəsində, - onu da qeyd etmək istəyirəm ki, bu əməliyyat təxribata cavab olaraq aparılmışdır, - biz böyük hərbi qələbəni qazandıq. Bu münasibətlə Ordumuzu, bütün Azərbaycan xalqını təbrik etmək istəyirəm."
       Öz növbəsində müdafiə naziri Zakir Həsənov vurğulamışdır ki, " ... ehtimal olunan istiqamətdə erməni silahlı qüvvələrinin ehtiyatlarının hərəkətini də nəzərə alaraq, aprelin 1-dən 2-nə keçən gecə Azərbaycan Silahlı Qüvvələrinin kəşfiyyat qrupları 3 istiqamətdə planlı şəkildə tədbirlər həyata keçirmişdir. Əməliyyat şəraitini nəzərə alaraq, Talış və Seysulan kəndləri, bir də Horadiz istiqamətində olan təpələr aparılan döyüş əməliyyatları ilə ələ keçirilmişdir."
       Lakin çox təəssüf ki, azğın erməni işğalçılarının silahlı təxribatı nəticəsində itkilərimiz də vardır. Hərbiçilərimiz və mülki şəxslər həlak olmuşlar. müqəddəs şəhidlik zirvəsinə ucalmışlar. Vətən uğrunda bir an tərəddüd etmədən canını fəda etmiş igidlərdən biri də Sarvan Mehralıyev oldu. Xocalı şəhərindən məcburi köçkün düşmüş və hal-hazırda Pirallahı rayonunda müvəqqəti məskunlaşmış Mehralıyev Sarvan Natiq oğlu 8 iyul 1997-ci ildə anadan olub, Bakı şəhəri, Pirallahı rayonu, 186 №-li tam orta məktəbin 2014-cü il məzunudur. 1996-cı ildə anadan olmuş qardaşı – Mehralıyev Namiq Natiq oğlu da 186 №-li tam orta məktəbi bitirmişdir. Hər iki qardaş – Namiq və Sarvan Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Xocalı rayon bölməsi tərəfindən 2015-ci ilin iyul ayında həqiqi hərbi xidmətə çağrılmış və hər ikisi cəbhə xəttində, “N” saylı hərbi hissəsində xidmətə başlamışlar. Xidmətdə olduqları 10 ay  müddətində nümayiş etdirdikləri nizam-intizama, bir neçə dəfə mühüm hərbi tapşırıqları müvəffəqiyyətlə yerinə yetirdiklərinə görə fəxri fərman və təşəkkürnamə ilə təltif ediliblər. Aprel ayının 1-dən 2-nə keçən gecə cəbhənin Füzuli istiqamətində erməni hərbi birləşmələrinin təxribatının qarşısını alarkən hər iki qardaş qaynar döyüş gedən ön mövqedə döyüşüblər. Düşmənin təhlükəli atəş nöqtəsini susdurmaq üçün ilk olaraq böyük qardaş Namiq irəli atılıb. Lakin onun polad dəbilqəsinə dəyən snayper gülləsi Namiqin irəliləməsinə mane olub. Daha sonra onların bir döyüş yoldaşı eyni əməliyyatı yerinə yetirməyə çalışsa da qolundan yaralanıb. Nəhayət üçüncü cəhddən bu mühüm döyüş tapşırığını Sarvan yerinə yetirir və mənfur düşmənin xain gülləsinə tuş gələrək şəhid olur... Şəhid Sarvan Natiq oğlu Mehralıyev 3 aprel 2016-cı il tarixdə Ağdam rayonu, Ballar yaşayış məntəqəsində, böyük bir izdihamın müşayiəti ilə kənd qəbristanlığında torpağa tapşırıldı...
        Aprelin 4-də isə şəhidimizin böyüyüb boya-başa çatdığı Pirallahı rayonunda, 11 il təhsil aldığı 186 №-li tam orta məktəbdə Sarvan Natiq oğlu Mehralıyevin əziz xatirəsini anmaq məqsədilə törən təşkil edildi. Pirallahı Rayon İcra Hakimiyyətinin, Qaçqınların və Məcburi Köçkünlərin İşləri üzrə Dövlət Komitəsinin Bakı şəhəri Pirallahı rayonu üzrə sektorunun, Qarabağ əlillərinin və müharibə veteranlarının, Azərbaycan Respublikası Milli Qəhrəmanları Tanıtma İctimai Birliyinin, rayon ictimaiyyətinin nümayəndələrinin, şəhidin sinif yoldaşlarının iştirakı ilə keçirilən tədbirdə şəhid Sarvan Mehralıyev dərin hüzn, eyni zamanda böyük qürur hissi ilə anıldı. 186 №-li tam orta məktəbin direktoru Arif Xankişiyev, Pirallahı Rayon İcra Hakimiyyətinin məsul əməkdaşı Vüsal Babayev, Dövlətqaçqınkomun Pirallahı rayonu üzrə sektor müdiri İlqar Məmmədli, 186 №-li tam orta məktəbin direktor müavini və şəhidin qohumu Həcər Ramazanova, Qarabağ müharibəsi veteranı Mübariz Xudaverdiyev və digər çıxış edənlər Sarvanın keçdiyi qısa, lakin dərin mənalı, bir çox nəsillərə örnək ola biləcək həyat yolundan geniş söhbət açdılar, Allah, vətən və millət yolunda canından keçən şəhidlərin ən yüksək məqama, şərəfli bir zirvəyə yüksəldiklərini vurğuladılar. Bildirildi ki, öz canları və qanları hesabına Azərbaycana azadlıq və müstəqillik qazandıran ataların və babaların qəhrəmanlıq yolunu davam etdirən Sarvan məktəbin bütün tədbirlərində fəal iştirak edən intizamlı bir şagird, hər an ehtiyac duyana köməyə gəlməyə hazır olan etibarlı bir dost, bir çox yarışlarda uğur qazanmış məharətli bir idmançı, Vətəni böyük məhəbbətlə sevən igid bir gənc olmuşdur. Sinif yoldaşları onunla fəxr etdiklərini, Sarvanla bir sinifdə oxuduqları üçün qürur duyduqlarını, Ali Baş Komandanın əmri olarsa Sarvanın qəhrəmanlığını təkrarlamağa hazır olduqlarını dilə gətirdilər. Şəhidin döyüş yolundan ətraflı danışan qardaşı Namiq Mehralıyev buradan birbaşa cəbhə bölgəsinə qayıdacağını, döyüş dostları ilə birlikdə Sarvanın qisasını yağı düşməndən onqat çıxacağını vurğuladı, bütün Pirallahı gənclərini Sarvandan nümunə götürməyə, Vətəni Sarvan kimi sevməyə, ali məqsədlər uğrunda, müqəddəs amallar uğrunda döyüşə hazır olmağa çağırdı.

Şəhidlər ana yurdu tutdular candan baha,
Şəhidlər yollar açdı, qaranlıqdan sabaha.
Şəhidlər ölməz ruhla, gedir üzü Allaha,
Şəhidlər gedən yolu tufanlar bağlamazlar.
Şəhidlər ölməzdirlər, ölməzi ağlamazlar!
Şəhidlər ölməz, Vətən bölünməz! Hər şey Vətən üçün!