Bu il 14 məzunumuz 500-dən çox bal topladı

         Hər bir xalqın mənəvi həyatını onun ədəbiyyatı və mətbuatı ilə bərabər maarifi və təhsili də əks etdirir. Bu mənada çoxəsrlik zəngin tarixə malik olan Azərbaycan təhsili xalqımızın ən böyük mənəvi sərvətlərindən biridir desək, əlbəttə ki, yanılmarıq. Müəllim, pedaqoq adı bizdə həmişə böyük hörmətlə çəkilib. Azərbaycanda təhsilin inkişaf səviyyəsi daim o qədər yüksək olub ki, o, Yaxın Şərqdə və bütövlükdə Avrasiya məkanında təhsilin, o cümlədən dünyəvi təhsilin inkişafına da önəmli töhfələr vermişdir. Sevindirici haldır ki, Pirallahı rayonunun təhsil işçiləri də uzun illərdir böyüməkdə olan nəslin milli, vətənpərvər ruhda tərbiyə alması, savadlı, intellektual gənclər kimi yetişməsi üçün bilik və bacarıqlarını əsirgəmirlər. Pirallahı Rayon İcra Hakimiyyəti də rayonun təhsil sisteminin inkişafına öz töhfəsini verir, əlindən gələn köməyi göstərməyə çalışır.
         Qeyd edək ki, 2015 - 2016-cı tədris ilini Pirallahı rayon məktəbləri üçün uğurlu hesab etmək olar. Belə ki, 6 məktəb üzrə 197 məzundan 142 abituriyent ali məktəblərə sənəd vermiş və ilkin nəticələrə görə bunlardan 71 nəfəri tələbə adını qazanmışdır. Qeyd edək ki, 168 №-li tam orta məktəbin şagirdi Rəşidə Əsədova 635 balla Pirallahı rayonu üzrə ən yüksək nəticə əldə etmişdir və Azərbaycan Dövlət İqtisad Universitetində təhsil alacaqdır.
          Daha 13 nəfər Pirallahı rayon məktəblisinin nəticəsi 500 baldan yuxarıdır ki, bu da rayon tarixində ən yüksək orta bal göstəricisinin əldə olunması deməkdir. Məzunlarımız Ayşən Aslanova (593 bal, ADİU - 235 nömrəli tam orta məktəbin məzunu), İnarə Süleymanova (590 bal, BDU - 168 nömrəli tam orta məktəbin məzunu), Nazxanım Fərruxova (580 bal, Azərbaycan Dillər Universiteti - 186 nömrəli tam orta məktəbin məzunu), Sadix Abdullayev (579 bal, Gömrük Akademiyası - 168 nömrəli tam orta məktəbin məzunu), Səbinə Paşayeva (561 bal, BDU - 168 nömrəli tam orta məktəbin məzunu), Səmayə Biləndərli (556 bal, BDU - 186 nömrəli tam orta məktəbin məzunu), Vəfa Səfərova (548 bal, Azərbaycan Dövlət Pedaqoji Universiteti - 235 nömrəli tam orta məktəbin məzunu), Erziman Zeyfatov (537 bal, Xəzər Universiteti - 243 nömrəli tam orta məktəbin məzunu), Gülüm Zeynalova (534 bal, BDU - 168 nömrəli tam orta məktəbin məzunu), Sücayə Qarayeva (514 bal, Azərbaycan Neft Akademiyası - 168 nömrəli tam orta məktəbin məzunu), Raqib Məmmədov (509 bal, ADİU - 168 nömrəli tam orta məktəbin məzunu), Zərifə Tağıyeva (506 bal, BDU - 186 nömrəli tam orta məktəbin məzunu) və Eyvazlı Elnarə Elman qızı (502 bal, Azərbaycan Dillər Universiteti - 243 nömrəli tam orta məktəbin məzunu) təhsil alacaqları ali məktəblərdə rayonumuzun adını daim yüksəltməyə calışacaqlar.