Pirallahı məktəbliləri arasında futbol üzrə rayon birinciliyi başa çatdı

08 fevral 2017 | 11:00

Azərbaycan Respublikasının Prezidenti cənab İlham Əliyevin tapşırığına əsasən ölkəmizdə idmanın kütləviliyinin artırılması, uşaq, yeniyetmə və gənclərin fiziki sağlamlıqlarının möhkəmləndirilməsi məqsədi ilə Pirallahı rayonunda müvafiq tədbirlər görülür. Pirallahı Rayon İcra Hakimiyyəti başçısı tərəfindən təsdiqlənmiş tədbirlər planına əsasən rayonda mütəmadi olaraq müxtəlif idman növləri üzrə yeniyetmələr və gənclər arasında yarışlar, rayon birincilikləri, turnirlər təşkil olunur.

08 fevral 2017-ci il tarixində Pirallahı məktəbliləri arasında futbol üzrə rayon birinciliyinin final mərhələsi keçirildi. Azərbaycan Respublikası Təhsil Nazirliyi və AFFA-nın birgə təşkilatçılığı ilə keçirilən turnirdə finala çıxan 243 və 186 nömrəli tam orta məktəblərinin futbol komandaları öz qüvvələrini sınadılar. Pirallahı rayonundakı 186 №-li məktəbin həyətində qurulmuş süni örtüklü idman meydançasında keçirilən final görüşünün nəticəsinə görə 186 nömrəli tam orta məktəbin komandası birinci yeri qazandı. Qalib komandaya AFFA tərəfindən qiymətli hədiyyələr təqdim olundu.
Qeyd edək ki, Azərbaycanda futbol sahəsində həyata keçirilən dövlət siyasəti və futbol infrastrukturunun müasir tələblər səviyyəsinə yüksəldilməsi gənclərin futbola olan marağını artırır.

Keçidlər