Məqsəd Pirallahını paytaxtımızın ən qabaqcıl rayonlarından birinə çevirməkdir
Başçı yanında Şuranın iclasında 2017-ci ilin birinci rübündə rayonda görülən işlərdən, həyata keçirilən layihələrdən və qarşıda duran vəzifələrdən geniş söhbət açıldı
Artıq tarixə çevrilmiş 2017-ci ilin birinci rübü ölkəmizin müstəqillik salnaməsində uğurlu bir səhifə kimi öz layiqli yerini tutmuşdur. Azərbaycan Respublikasının Prezidenti İlham Əliyev cənablarının düşünülmüş, məntiqli və məqsədyönlü siyasəti Azərbaycanın beynəlxalq nüfuzunun əhəmiyyətli dərəcədə yüksəlməsinə və xalqımızın rifah halının daha da yaxşılaşdırılmasına xidmət etmişdir.
Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2017-ci ilin birinci rübünün sosial-iqtisadi inkişafın yekunlarına və qarşıda duran vəzifələrə həsr olunmuş geniş iclasındakı nitqindən irəli gələn vəzifələr Pirallahının sənaye müəssisələri, təsərrüfat xidmətləri, təhsil, səhiyyə, mədəniyyət müəssisələri, hüquq-mühafizə orqanları rəhbərlərinin, bələdiyyə üzvlərinin, ağsaqqallar, gənclər və rayon ictimaiyyəti nümayəndələrinin iştirakı ilə keçirilən Pirallahı rayon İcra Hakimiyyəti Başçısı yanında Şuranın iclasında ətraflı müzakirə olunmuşdur. İclası giriş sözü ilə açan Pirallahı rayon İcra Hakimiyyəti Başçısı Vasif İmanov Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2017-ci ilin I rübünün sosial-iqtisadi inkişafın yekunlarına həsr olunmuş iclası barədə ətraflı məlumat vermişdir.
Daha sonra Dövlət Proqramlarının icra vəziyyəti və qarşıda duran vəzifələrdən söz açan Vasif İmanov qeyd etmişdir ki, Pirallahı adasını Abşeron yarımadası ilə birləşdirən avtomobil yolu körpüsündə tikinti-quraşdırma işləri tamamlanaraq, hazırda körpünün yan tərəfindəki mövcud yolda işlər davam etdirilir. Eyni zamanda Gürgən qəsəbəsində geniş miqyaslı abadlıq-quruculuq işlərinə start verilmişdir. Mərkəzi yol boyu Abşeron memarlığını özündə əks etdirən qala divarı, dekorativ hasarlar, 6 ədəd bürc inşa olunur. Buradakı qədim bulağın bərpası da nəzərdə tutulmuşdur. Əhalinin istirahəti üçün Gürgəndəki gölün ətrafında parkın salınması işləri həyata keçirilir. Artıq gölün üzərində piyadalar üçün körpü düzəldilmiş, ətrafında 4 metr enində yol çəkilmiş, 9 metr hündürlüyündə şəlalə quraşdırılmış, arxadakı yamac hissədə yaşıllıqlar salınmışdır.
Gürgən qəsəbəsindən avtomobil yolu körpüsünə gedən mərkəzi yol boyu dəniz kənarı ilə böyük bir sahədə balıqçı və neftçilərə aid qayıqlar, neft çənləri, balıqçı heykəli, qaya daşları və s. estetik gözəllik yaradan elementlərdən ibarət kompozisiyanın qurulması nəzərdə tutulmuşdur.
Bildirilmişdir ki, rayonun Baş planı Fövqəladə Hallar Nazirliyinin Ekspertiza idarəsinə təqdim etmək üçün artıq hazırdır. Həmçinin, rayon mərkəzi olan Pirallahı qəsəbəsinin Baş və müfəssəl planı hazırlanır, Gürgən qəsəbəsində isə “Yeni Şəhər”in salınması məqsədilə müvafiq layihələndirmə işləri aparılır. Rayonda salınacaq “Yüksək Texnologiyalar Parkı”nda da lahiyələndirmə işləri davam edir. Burada katric istehsalı üzrə müəssisənin tikintisi üçün 2,5 ha torpaq sahəsi ayrılmışdır.
Rayon üzrə məktəbəqədər tərbiyə müəssisələrinə olan tələbatı ödəmək məqsədilə Heydər Əliyev Fondunun təşəbbüsü və dəstəyi ilə tikilən 2 ədəd 140 və 100 yerlik körpələr evi - uşaq bağçasının inşaat işləri davam etdirilir. Artıq 140 yerlik körpələr evi - uşaq bağçasında işlər tamamlanmaq üzrədir. Sakinlərin mənzil-məişət şəraitinin yaxşılaşdırılması məqsədilə K.Rzayev küçəsində məhəllələrdə abadlıq işləri aparılaraq 6, 12, 16 nömrəli, İ.Fioletov küçəsində 8, 14, 18, 20, 22 nömrəli, S.Bağırov küçəsində 3 nömrəli yaşayış binalarının fasadlarında təmir işləri görülmüşdür. K.Rzayev küçəsindəki 4, 18 və 22 nömrəli yaşayış binalarında isə təmir işləri davam etdirilir.
Rayon mərkəzinin girişində böyük ölçülü “Pirallahı” yazısı və rayonun simvolu quraşdırılmış, gecə işıqları ilə təchiz olunmuşdur. Yolun qarşı tərəfində isə müxtəlif ölçüdə qaya daşlarından ibarət dekorativ kompozisiya qurularaq üzərinə ölkədə mövcud olan tarixi və müasir tikililəri, təbiət mənzərələrini özündə əks etdirən rəsmlər həkk olunmuşdur. Pirallahı qəsəbəsində uzunluğu 10 kilometrədək, eni 12-22 metr olmaqla mərkəzi yolda əsaslı təmir işləri davam etdirilmiş, yol boyu mövcud torpaq qatı çıxarılmış və yeni yol yatağı tikilərək alt asfalt-beton qatı çəkilmiş, yeni bardürlər düzülmüş, 69 ədəd gecə işıq dirəyi və 9 ədəd müasir avtobus dayanacağı quraşdırılmışdır. Hazırda Səməd Vurğun küçəsində yeni avtomobil dayanacağının inşası aparılır.
2017-ci ilin birinci rübü ərzində Pirallahı qəsəbəsində qaz xətlərinin yeraltı polietilen borularla əvəz olunması işləri davam etdirilmiş, Gürgən qəsəbəsindən keçən magistral yolun çəkilişi ilə əlaqədar kommunikasiya xətlərinin yeraltına keçirilməsi işləri aparılmışdır. Elektrik təsərrüfatı tam modernləşdirilmiş, 35 kVt-lıq hava elektrik xətti də daxil olmaqla 16000 metr elektrik xətti yeraltına salınmış, 11 yarımstansiya yenidən qurulmuşdur.
Magistral yolun yenidən qurulması ilə əlaqədar müxtəlif diametrli 1180 metr su xəttinin yeri dəyişdirilmiş, K.Rzayev küçəsi, 40-cı, 28-ci və 29-cu məhəllələrdə yaşayış binalarının zirzəmilərində təmir işləri aparılmış, zirzəmilər çirkab və qrunt sularından təmizlənmişdir. Yağış sularının axıdılması məqsədi ilə 110 metr drenaj xətti çəkilmiş, 2020 metr su və 850 metr kanalizasiya xətti təmir edilmiş, müxtəlif diametrli 8500 metr kanalizasiya xətti isə mexaniki üsulla təmizlənmiş, Gürgən qəsəbəsində əhalinin bir qismi 24 saatlıq içməli su ilə təmin edilmişdir.
Qəsəbədə ümumi sahəsi 1 hektara qədər olacaq “Yaşıl park” salınır. Həmçinin ərazidə metal konstruksiyadan kafe və ticarət mərkəzinin inşası aparılır. 28-ci məhəllədə yeni yanacaqdoldurma məntəqəsinin inşaat işləri, «Nümunəvi Həyətlər» layihəsi çərçivəsində aparılan işlər, “Yaşıl bazar”ın tikintisi, 77 saylı poçt şöbəsinin yaxınlığında yerləşən ictimai-iaşə obyektində isə yenidənqurma işləri davam etdirilir.
Sənaye sahəsində görülən işlərdən söz açan V.İmanov vurğuladı ki, Pirallahı adasının sənaye zonasında 6,4 ha sahədə “Abşeronneft” NQÇİ-nin “Rezervuarlar Park”ının tikintisi məqsədilə kommunikasiya xətləri ərazidən çıxarılmışdır. Burada ümumi tutumu 30 min tonluq 24 çən quraşdırılıb və köçürülmə üçün hazırlıq işləri gedir. Pirallahı “Yanalma körpüləri kompleksi”nin tikintisində işlər dəniz akvatoriyasında və sahil boyu davam etdirilir.
2017-ci il yanvarın 16-da Pirallahı Sənaye Parkında "Caspian Pharmed" əczaçılıq zavodunun təməlqoyma mərasimi keçirilmişdir. Azərbaycan Respublikasının İqtisadiyyat naziri Şahin Mustafayev, İranın Kooperasiya, əmək və sosial rifah naziri Əli Rəbiinin iştirakı ilə keçirilmiş tədbirdə əczaçılıq zavodunun yaradılmasına dair “Azərbaycan İnvestisiya Şirkəti” ASC, “Azərsun Holdinq” və İranın "TPİCO Holding" arasında Səhmdarlar Sazişi imzalandı. Sənədə əsasən, Pirallahı Sənaye Parkında əczaçılıq zavodunun tikintisi məqsədilə yaradılmış "Caspian Pharmed" birgə müəssisəsində "Azərbaycan İnvestisiya Şirkəti" ASC 25%, “Azərsun Holdinq” 26%, İranın “TPİCO” şirkəti isə 49% iştirak payına malikdir. Daha bir neçə ölkə ilə dərman zavodlarının tikintisinə dair danışıqlar aparılır. Bu il rayonda “Nərəkənd” balıqyetişdirmə kompleksinin tikintisi də planlaşdırılır ki, burada da ilkin mərhələdə ildə 150 min ton balıq, 5 ton kürü istehsalı nəzərdə tutulur. Artıq müəssisənin ərazisinin abadlaşdırılması, burada müasir park kompleksinin salınması işlərinə start verilmişdir.
Alternativ və Bərpa Olunan Enerji Mənbələri üzrə Dövlət Agentliyi üçün ayrılmış 2 hektar torpaq sahəsində 2.8 MW gücündə Günəş enerjisinə əsaslanan elektrik stansiyasının tikintisi yekunlaşaraq quraşdırma, sazlama işləri başa çatdırılmış və stansiya tam olaraq ümumi şəbəkəyə qoşulmuşdur. Yeni avadanlıqların quraşdırılması məqsədilə Agentliyə, əlavə olaraq, 5 ha torpaq sahəsi ayrılmışdır.
Pirallahı rayon İcra Hakimiyyəti tərəfindən sahibkarlığın inkişafı istiqamətində cari ilin birinci rübü ərzində məqsədyönlü tədbirlər həyata keçirilmiş, rayon ərazisində iqtisadi durumun yaxşılaşdırılması, sağlam biznes mühitinin formalaşdırılması, investisiyaların cəlb edilməsi, kiçik və orta sahibkarlığın inkişafı və əhalinin işgüzarlıq fəaliyyətinin artırılması üçün münbit şəraitin yaradılması, yeni istehsal və emal müəssisələrinin açılması, məşğulluq səviyyəsinin artırılması və əhalinin maddi rifahının yüksəldilməsi ilə bağlı fəaliyyət genişləndirilmişdir.
Məcburi köçkünlərin mənzil-məişət şəraitinin yaxşılaşdırılması məsələləri daim diqqət mərkəzində olmuşdur. Məcburi köçkünlərin kompakt şəkildə məskunlaşdığı S.Vurğun küçəsində yerləşən Köhnə xəstəxana binasının dam örtüyü əsaslı təmir edilmiş, damın köhnə tol örtüyü tamamilə götürülərək əvəzinə şifer vurulmuş, 200 m kanalizasiya xətti çəkilmişdir. Digər binalarda mütəmadi cari təmir işləri həyata keçirilir.
Ətraf mühitin qorunması, ekoloji tədbirlər və turizmin inkişafından danışan V.İmanov hesabat dövründə Pirallahı rayonunda ekoloji tarazlığın bərpası və ətraf mühitin təhlükəsizliyi, insanların sağlamlığının təmin edilməsi, rayonda yaşıllıqların artırılması, yeni ağacların əkilməsi istiqamətində silsilə tədbirlər həyata keçirildiyini, mütəmadi olaraq iməcilik və ağacəkmə aksiyalarının təşkil edildiyini, 20 minə yaxın müxtəlif növ həmişəyaşıl və meyvə ağaclarının əkildiyini qeyd etmişdir. Bundan əlavə mərkəzi yol kənarında müxtəlif landşaft kompozisiyaları düzəldilmiş, yamaclar, təpələr qurulmuş, hamarlanma işləri aparılmış, ərazi qaya daşları, gül və kol bitkiləri ilə bəzədilmişdir. Həmçinin mərkəzi yol kənarı boyu yolun hər iki tərəfi nəzərə alınmaqla ümumi uzunluğu 600 metr olan dekorativ çəpərlər quraşdırılmışdır. Ekologiyaya ciddi zərbə vuran süni göllərin qurudularaq yerində yeni yaşayış massivlərinin, abad məhəllələrin salınması üçün müvafiq tədbirlər görülmüşdür.
Pirallahı rayonunun coğrafi mövqeyi və iqlim şəraiti turizmin inkişafı üçün olduqca əlverişlidir. Pirallahı adasının sahil boyu ərazilərində dənizkənarı bulvar, attraksionları olan istirahət parkı, otel, kafe, kütləvi çimərliklər, açıq havada idman-konsert kompleksi, yaxt-klub, sörfinq klubları və s. yaradılması üçün əlverişli şərait vardır və bu istiqamətdə müvafiq işlər aparılır.
Hesabat dövründə Pirallahı rayonunda həyata keçirilən ictimai-siyasi və ideoloji işin keyfiyyətinin yaxşılaşdırılması, ictimai təşkilatlar və dini qurumlarla qarşılıqlı əlaqənin inkişafını təmin etmək üçün müvafiq tədbirlər həyata keçirilmişdir. Həmçinin ümumtəhsil məktəblərində şagirdlərin vətənpərvərlik ruhunda tərbiyəsi məqsədilə görülən işlər gücləndirilmiş, maarifləndirici tədbirlər həyata keçirilmiş, şəhid, aztəminatlı və sosial müdafiəyə ehtiyacı olan ailələr daim diqqətdə saxlanılmış və onlara qayğı göstərilmiş, əhalinin sağlamlığının qorunması məqsədilə sakinlərin tibbi müayinədən keçirilməsinə ciddi nəzarət olunmuş, idmanın kütləviliyinin artırılması üçün müvafiq tədbirlər görülmüşdür. Ümumilikdə rüb ərzində İcra Hakimiyyəti və digər rayon təşkilatları tərəfindən 50-dən çox tədbir həyata keçirilmiş, Prezident İlham Əliyevin yürütdüyü siyasətin təbliği, ümummilli lider Heydər Əliyevin irsinin öyrədilməsi ilə bağlı açıq dərslərin keçirilməsi, Ulu Öndərin azərbaycançılıq məfkurəsinin təşviqi, böyüməkdə olan nəslin hərbi-vətənpərvərlik tərbiyəsi, qüdrətli Azərbaycan ordusuna dəstək tədbirləri, tarixi və əlamətdar günlərin qeyd olunması məsələləri gündəlik fəaliyyətin əsas istiqamətlərini təşkil etmişlər.
Rayonda işsiz və işaxtaran vətəndaşların sosial müdafiəsini gücləndirmək məqsədilə bir sıra tədbirlər görülmüşdür. Belə ki, birinci rüb ərzində Pirallahı rayon Məşğulluq Mərkəzi tərəfindən 794 nəfər iş axtaran vətəndaş qeydiyyata alınmış, qeydiyyatda olan qeyri-məşğul əhalinin 228 nəfəri münasib işlə təmin olunmuş, 4 nəfər vətəndaşa işsizlik statusu verilmiş, 5 nəfərə isə işsizlik müavinəti təyin olunmuşdur. Həmçinin, rüb ərzində 230 vakant iş yeri barədə məlumat toplanılıb qeyri-məşğul əhaliyə təqdim olunmuşdur. O cümlədən, Azərbaycan Respublikası Prezidentinin əhalinin məşğulluq səviyyəsinin artırılması, yeni iş yerlərinin açılması ilə bağlı tapşırıqlarının icrası ilə əlaqədar olaraq 2017-ci ilin birinci rübündə Pirallahı rayonu ərazisində müvəqqəti açılmış iş yerləri üzrə ümumilikdə 177 nəfər, SOCAR-ın müəssisələri üzrə 98 nəfər, abadlıq və təmizlik işləri üzrə 54 nəfər, rayon ərazisində olan çoxmənzilli binaların təmiri ilə əlaqədar 25 nəfər müvafiq işlə təmin olunmuşdur.
Hesabatın sonunda V.İmanov vurğulamışdır ki, Azərbaycan Respublikasının Prezidenti cənab İlham Əliyevin yerli icra strukturlarına verdiyi tapşırıqların icrası ilə bağlı Pirallahı rayon İcra Hakimiyyəti tərəfindən cari ilin birinci rübü ərzində məqsədyönlü tədbirlər həyata keçirilmişdir. Bildirilmişdir ki, cənab Prezident tərəfindən təsdiq edilmiş Dövlət Proqramlarında Pirallahı rayonunun sosial-iqtisadi problemlərinin həlli və gələcək inkişaf perspektivləri də öz əksini tapmışdır. Planlaşdırılan işlər sırasında Gənclər evinin tikintisi, gənclərin asudə vaxtının səmərəli təşkili məqsədilə “Gənclər Mərkəzi”nin yaradılması və həmin mərkəzdə istirahət obyektlərinin inşası, RİH-nin hazırda inşa edilən inzibati binasının qarşısındakı parkın abadlaşdırılması, dənizkənarı parkın salınması, 235 №-li tam orta məktəbin cari təmiri, 6 əlavə sinif otağının tikintisi, 14 saylı Uşaq Musiqi Məktəbi üçün yeni binanın tikintisi, Pirallahıda idmanın daha da inkişafı məqsədilə mövcud stadionun əsaslı təmir olunaraq genişləndirilməsi və idman meydançalarının yaradılması, rayon ərazisində 297 ədəd 1 mərtəbəli və hündürmərtəbəli binaların qəzalı vəziyyətdə olması ilə əlaqədar tədbirlər, alternativ enerji mənbələrindən olan külək və günəş enerjisi avadanlıqlarının qurulmasının davam etdirilməsi, Pirallahı və Çilov adaları arasında inşa ediləcək estakadalar boyunca salınacaq platformaların üzərində külək elektrik stansiyalarının quraşdırılması, əhalinin 24 saat fasiləsiz su ilə tam təmin olunması, eyni zamanda Pirallahı qəsəbəsində kənd təsərrüfatı məhsullarının tədarükü, saxlanması və satışı üzrə logistika mərkəzinin tikintisi, kiçik sahibkarlığın inkişafının dəstəklənməsi layihələri prioritet məsələlər olaraq qalır.
Hesabat ətrafında çıxış edən 9 №-li “Yol İstismarı” MMC-nin direktoru Baxarəddin Rəsulov, DSMF-nin Pirallahı rayon şöbəsinin müdiri Xançoban Dəmirov, Pirallahı rayon MKTB-nin rəisi Manaf Manafov və başqaları əldə olunmuş uğurlardan, mövcud problemlər və onların aradan qaldırılması yollarından danışmış, 2017-ci ilin ötən dövrü ərzində Pirallahı rayonunda görülən işləri qənaətbəxş hesab etmişlər. İlk üç ay ərzində rayonda həyata keçirilən işlər, icra edilən dövlət proqramları onu deməyə əsas verir ki, etnik tərkibin zənginliyi ilə fərqlənən Pirallahı rayonunun sakinləri Prezident İlham Əliyevin Sərəncamı ilə “İslam Həmrəyliyi ili” elan olunmuş 2017-ci ili də uğurla başa vuracaqlar.
