Ulu öndər Heydər Əliyevin anadan olmasının 94-cü ildönümü ilə bağlı Pirallahı rayonunda silsilə tədbirlər keçirilir

  2017-ci ilə uğurla başlayan Pirallahı rayonunun zəhmətkeşləri aprel ayının əvvəlindən Azərbaycan xalqının ümummilli lideri Heydər Əliyevin anadan olmasının 94-cü ildönümü ilə əlaqədar Pirallahı Rayon İcra Hakimiyyəti başçısının təsdiq etdiyi Tədbirlər Planına uyğun olaraq silsilə tədbirlərə start vermişlər. Rayonun bütün idarə, müəssisə və təşkilatlarında, eləcə də ümumrayon səviyyəsində müxtəlif idman növləri üzrə turnirlər keçirilmiş, orta məktəblərdə inşa yazı, rəsm, şeir, mahnı müsabiqələri və idman yarışları təşkil olunmuş, Çilov, Neft Daşları, Gürgən qəsəbələrində, xüsusilə rayon mərkəzi olan Pirallahı qəsəbəsində abadlıq, təmizlik işləri aparılmış, hər həftənin şənbə günləri iməciliklər təşkil edilərək yaşıllaşdırma və ağacəkmə kampaniyaları həyata keçirilmiş, yüzlərlə ağac, təbii güllər əkilmiş və bu işlər davam etdirilməkdədir.
  Keçirilən tədbirlərdə qeyd edilmişdir ki, müasir müstəqil Azərbaycan ulu öndər Heydər Əliyevin düşünülmüş, müdrik və qalibiyyətli inkişaf strategiyasının təntənəsidir. Azərbaycanın güclənən mövqeləri, iqtisadiyyatının inkişafı, beynəlxalq nüfuzunun artması, xüsusən, Prezident İlham Əliyevin prinsipial məsələlərdə siyasi iradə nümayiş etdirməsi, xalq-iqtidar birliyi o deməkdir ki, ulu öndər Heydər Əliyevin sosial-iqtisadi və siyasi inkişaf konsepsiyası məhz o dahi şəxsiyyətin arzuladığı kimi uğurla davam etdirilməkdədir. Ölkənin davamlı inkişafına, milli maraqlarımıza, xalqın rifah halının yaxşılaşdırılmasına xidmət edən sosial-iqtisadi strategiya bu gün Prezident İlham Əliyevin rəhbərliyi altında davam etdirilərək, ölkə başçısının ardıcıl, məqsədyönlü və praqmatik siyasəti sayəsində müvəffəqiyyətlə reallaşmaqdadır. Bu uğurlu inkişaf xətti Pirallahı rayonunun da ildən-ilə çiçəklənməsinə, əhalisinin maddi-rifah halının get-gedə daha da yüksəlməsinə xidmət edir.
Qeyd edək ki, Mayın 3-də “Gülüstan” sarayında ümummilli lider Heydər Əliyevin anadan olmasının 94-cü ildönümü münasibətilə təşkil olunmuş “Ən yaxşı təqdimat” müsabiqəsində Gürgən qəsəbəsində yerləşən 231 N-li tam orta məktəbin XI sinif şagirdi Cabbarova Həbibə iştirak etmiş və II yerə layiq görülmüşdür.
10 may 2017-ci il tarixdə ulu öndər Heydər Əliyevin anadan olmasının 94-cü ildönümü münasibətilə Rayon İcra Hakimiyyətinin təşkilatçılığı ilə Pirallahı və Gürgən qəsəbələrində ümumrayon iməciliyi keçirilmişdir. Rayonun bütün idarə, müəssisə və təşkilatlarının iştirakı ilə keçirilən agacəkmə aksiyasında sadə vətəndaşlar da könüllü olaraq böyük həvəslə iştirak etmişlər. Aksiya zamanı 500-dən artıq  müxtəlif növ ağac (zeytun, eldar şamı, kiparis və s.) və gül kolları əkilmiş, qazon örtüyü salınmış, həmçinin əkilmiş ağaclar suvarılmış, dirəklərlə möhkəmləndirilmişdir. Ərazidə geniş abadlıq işləri həyata keçirilmişdir.