Dövlət qulluqçularının peşə bayramı günü qeyd edildi

     Hər il iyunun 23-ü ölkəmizdə dövlət qulluqçularının peşə bayram günü kimi qeyd olunur.  Bu bayram ilk dəfə BMT Baş Assambleyasının 20 dekabr 2002-ci il tarixli qətnaməsinə əsasən 2003-cü ildə Birləşmiş Millətlər Təşkilatının Dövlət Qulluğu Günü kimi qeyd edilmişdir. Dövlət qulluqçusunun dövlətin, cəmiyyətin və hər bir vətəndaşın həyatında önəmini, demokratik, hüquqi və dünyəvi dövlətin qurulması prosesində dövlət qulluğunun rolunu və BMT Baş Assambleyası tərəfindən iyunun 23-nün Birləşmiş Millətlər Təşkilatının Dövlət Qulluğu Günü elan edildiyini nəzərə alan Azərbaycan Respublikasının Prezidenti cənab İlham Əliyev həmin günü “Dövlət qulluqçularının peşə bayramı günü” kimi təsis etmişdir. Respublikamızda çalışan çoxsaylı dövlət qulluqçuları  öz bayramlarını 2006-cı ildən etibarən təntənəli şəkildə qeyd edirlər. Respublikamız müasir dünyada qəbul edilmiş dövlət idarəetmə sistemlərinə uyğun milli dövlət quruculuğu istiqamətdə islahatları uğurla davam etdirir. Bu islahatlardan məqsəd çevik dövlət idarəçilik sisteminin formalaşdırılması, insan və vətəndaş hüquq və azadlıqlarının yüksək dövlət təminatına nail olunması, bütövlükdə Azərbaycanın beynəlxalq aləmə inteqrasiyası prosesinin sürətləndirilməsindən ibarətdir.

     Bu gün Pirallahı Rayon İcra Hakimiyyətində də əlamətdar gün münasibətilə tədbir keçirildi. Tədbirdə çıxış edən RİH-nin başçısı Vasif İmanov dövlət qulluqçularını peşə bayramları münasibətilə təbrik etdi, onlara işlərində nailiyyətlər arzuladı. O, bu günün yaranma tarixi, Ulu Öndər Heydər Əliyevin müstəqil Azərbaycanda dövlət qulluğunun baza və prinsiplərinin yaranması ilə bağlı göstərdiyi böyük xidmətləri, möhtərəm Prezidentimiz İlham Əliyev tərəfindən dövlət qulluğunun qeyd edilməsi, qüvvəyə minməsi və digər hüququ aktlara dair imzaladığı qanun, fərman və sərəncamlar barədə geniş məlumat verdi. Qeyd etdi ki, bu sahədə çalışmaq böyük məsuliyyətdir. Natiq bildirdi ki, ölkə Prezidentinin dövlət qulluqçuları haqqında söylədiyi “Hər bir şəxs bilməlidir ki, dövlət qulluğunda olmaq imtiyaz deyil, məsuliyyətdir, insanlara xidmət imkanıdır” fikrini hər bir dövlət qulluqçusu öz əməli işi ilə hər zaman doğrultmağa çalışmalıdır. Hər bir dövlət qulluqçusu üzərinə düşən məsuliyyəti dərk edərək vətəndaşlara, xalqa xidmət etməyi özünün həyat amalı, məqsədi hesab etməlidir. Vətəndaşların müraciətini, qayğısını özünün qayğısı hesab etməli, daim vətəndaş məmnunluğunu təmin etməlidir.

     Artıq ənənəyə çevrilmiş və hər il böyük məmnuniyyətlə gözlənilən təşəbbüslərdən biri isə Azərbaycan Prezidenti cənab İlham Əliyevin imzaladığı “Dövlət qulluqçularının təltif edilməsi haqqında” Sərəncamdır. İyunun 21-də imzalanan builki Sərəncama əsasən, dövlət qulluğunda səmərəli fəaliyyətinə görə 2 nəfər 3-cü dərəcəli “Vətənə xidmətə görə” ordeni ilə, 32 nəfər “Tərəqqi” medalı ilə, 193 nəfər “Dövlət qulluğunda fərqlənməyə görə” medalı ilə təltif olunub. Həmçinin dövlət qulluğunda uzunmüddətli səmərəli fəaliyyətinə görə 2 nəfər “Əməkdar dövlət qulluqçusu” fəxri adına layiq görülüb. Qeyd edək ki, Pirallahı Rayon İcra Hakimiyyətinin də bir nəfər əməkdaşı “Dövlət qulluğunda fərqlənməyə görə” medalı ilə təltif olunub.