Dövlət idarəçiliyində, kütləvi informasiya vasitələrində Azərbaycan ədəbi dilinin düzgün tətbiq olunmasına həsr olunmuş maarifləndirici tədbir keçirildi

     01 Avqust 2022-ci il tarixdə Pirallahı rayon İcra Hakimiyyətinin təşkilatçılığı ilə Azərbaycan Respublikasının Prezidenti cənab İlham Əliyevin 09 aprel 2013-cü il tarixli, 2837 №li  Sərəncamı ilə təsdiq olunmuş “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nda icrası nəzərdə tutulan dövlət idarəçiliyində, kütləvi informasiya vasitələrində Azərbaycan ədəbi dilinin düzgün tətbiq olunması məqsədilə maarifləndirmə tədbirlərinin təşkili bəndinin icrası ilə bağlı maarifləndirici tədbir keçirildi. “01 Avqust - Azərbaycan əlifbası və Azərbaycan dili günü”nə təsadüf edən tədbirdə Pirallahı Rayon İcra Hakimiyyəti başçısının birinci müavini Vəzir Səfixanov və RİH başçısı Aparatının məsul əməkdaşları, YAP Pirallahı rayon təşkilatının rəhbərliyi, Azərbaycan Milli Elmlər Akademiyasının Nəsimi adına Dilçilik İnstitunun toponomika sektorunun müdiri, filologiya üzrə fəlsəfə doktoru dosent Elçin İsmayılov, RİH yanında İctimai Şuranın üzvləri, rayonda fəaliyyət göstərən ümumtəhsil və məktəbəqədər təhsil müəssisələrinin, səhiyyə və mədəniyyət ocaqlarının rəhbərləri, Qeyri-Hökumət Təşkilatlarının nümayəndələri, Azərbaycan-dili və ədəbiyyat müəllimləri, o cümlədən RİH başçısının qəsəbə inzibati ərazi dairəsi üzrə nümayəndəliklərində və bələdiyyələrdə dəftərxana işinin aparıcısı və kargüzarlıq işləri ilə məşğul olan kadrlar iştirak etdilər.

    Tədbiri giriş sözü ilə açan V.Səfixanov dili ilk növbədə onun daşıyıcısı olan xalqın yaşatdığını bildirərək, Azərbaycan dilinin tarixi inkişaf yolundan və keçdiyi keşməkeşli dövrlərdən bəhs etdi. Natiq əlavə olaraq, Ümummilli Liderin dövlət dili uğrunda ardıcıl mübarizə apardığını, ziyalıları, xalqı ana dilinin dövlət dili kimi yaşamaq hüququ uğrunda mübarizəyə cəlb etdiyini və beləliklə bütün qüvvələri bu amal uğruna səfərbər etdiyini bildirdi.

     Daha sonra Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdiri Arzu Abdullayev, filologiya üzrə fəlsəfə doktoru dosent Elçin İsmayılov və 168 saylı tam orta məktəbin Azərbaycan-dili və ədəbiyyat müəlliməsi Sevda Alxasova çıxış edərək dilimizin saflığının qorunmasının və özünəməxsus cəhətlərinə xələl yetirilmədən zənginləşdirilməsinin hazırda aktual məsələlərdən olduğundan və dilin yad ünsürlərdən qorumağın vacibliyindən bəhs etdi. Bununla yanaşı, çıxışlarda Azərbaycan Respublikasının mərhum Prezidenti Heydər Əliyevin 18 iyul 2001-ci il tarixli “Dövlət dilinin tətbiqi işinin təkmilləşdirilməsi haqqında” və 9 avqust 2001-ci il tarixli “Azərbaycan Əlifbası və Azərbaycan Dili Gününün təsis edilməsi haqqında” fərmanları, Ümummilli liderin ideyalarını bütün sahələrdə rəhbər tutan və dövrün tələblərinə uyğun gerçəkləşdirən Prezident İlham Əliyevin 17 iyul 2018-ci il tarixli “Azərbaycan dilinin elektron məkanda daha geniş istifadəsinin təmin edilməsi ilə bağlı bir sıra tədbirlər haqqında” Sərəncamı və  01 noyabr 2018-ci il tarixli “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” Fərmanları xatırladıldı. Natiqlər vurğuladı ki, bu gün dilimizin inkişafının əsas qarantı məhz ölkə rəhbəridir.

     Tədbir mövzu ilə bağlı iştirakçıları maraqlandıran sualların cavablandırılması ilə yekunlaşdı.